AMEA Hüseyn Cavidin Ev Muzeyində növbəti elmi seminar

26.04.2022

AMEA Hüseyn Cavidin Ev Muzeyində “Hüseyn Cavid yaradıcılığının tədrisi məsələləri” adlı elmi seminar keçirildi. Ali məktəb müəllimləri və tələbələrinin də cəlb olunduğu bu seminar muzeydə elmlə təhsilin inteqrasiyası çərçivəsində həyata keçirilən növbəti tədbirlərdən biri oldu. Dahi Azərbaycan şairi və dramaturqu Hüseyn Cavidin 140 illik yubileyi ərəfəsində baş tutan elmi seminarda Azərbaycan Dillər Universitetinin, Odlar Yurdu Universitetinin, Bakı Avrasiya Universitetinin Filologiya fakültələrinin I-IV kurslarında təhsil alan tələbələr dinləyici qismində iştirak edib.
Seminarda AMEA Hüseyn Cavidin Ev Muzeyinin Ekspozisiya şöbəsinin müdiri Lalə Əliyeva, Azərbaycan Dillər Universitetinin Azərbaycan ədəbiyyatı kafedrasının müəllimi, filologiya üzrə fəlsəfə doktoru Nuridə Muxtarzadə, Bakı Avrasiya Universitetinin Dünya ədəbiyyatı kafedrasının müəllimi, filologiya üzrə fəlsəfə doktoru Əfsanə Nağıyeva və həmin universitetin Ümumi filologiya fakültəsinin müəllimi Sevinc Talıbova çıxış etmişlər. “Hüseyn Cavid sənəti və müasir gənclik” problemi kontekstində müzakirələr aparılmış, tələbələri maraqlandıran suallar cavablandırılmışdır.
Elmi seminarda müzakirə olunan mövzular sırasında “Hüseyn Cavidin Avropa və Türkiyə ədəbiyyatının görkəmli nümayəndələri ilə müqayisəsi”, “Hüseyn Cavid və Tənzimat dövrü Osmanlı ədiblərinin əsərlərinin dilinin oxşar və fərqli cəhətləri”, “Müasir çağırışlar və qloballaşma dövründə Hüseyn Cavid əsərlərinin aktuallığı” daha çox diqqət mərkəzində olmuşdur.









© Bütün hüquqlar qorunur. Xəbərlərdən istifadə edərkən www.huseyncavid.az saytına istinad zəruridir.