AMEA Hüseyn Cavidin Ev Muzeyində 20 Yanvar şəhidlərinin xatirəsi anılıb

19.01.2021

20 Yanvar faciəsinin 31-ci ildönümü ilə əlaqədar AMEA Hüseyn Cavidin Ev Muzeyində “20 Yanvar – tariximizin şərəf və qəhrəmanlıq səhifəsidir” adlı anım tədbiri keçirilib. Tədbir 20 yanvar şəhidlərinin xatirəsinin bir dəqiqəlik sükutla anılması ilə başlayıb. AMEA Hüseyn Cavidin Ev Muzeyinin direktoru, fil.ü.e.d. Gülbəniz Babaxanlı Ümumxalq hüzn günü ilə bağlı çıxış edib. G.Babaxanlı Azərbaycan xalqının igid oğul və qızlarının 20 Yanvar hadisələri zamanı göstərdiyi şücaətdən, əliyalın əhalinin tankların qarşısında aciz qalmasından, vətəndaşlarımıza qarşı törədilmiş qanlı qətliamdan danışıb. Bu tarixin Azərbaycan xalqının yaddaşına qəhrəmanlıq, azadlıq salnaməsi kimi də yazıldığını qeyd edib. Alim bildirdi ki, xalqımızın Ümmumilli lideri Heydər Əliyev 20 Yanvar faciəsinin baş verdiyi günün səhəri Azərbaycanın Moskvadakı daimi nümayəndəliyinə getmiş və millətimizə qarşı törədilmiş ağır cinayətə öz kəskin etirazını bildirmişdir. Daha sonra Ulu öndərin siyasi kursunun layiqli davamçısı cənab İlham Əliyevin Azərbaycana rəhbərlik etdiyi dönəmdə xalqımızın əldə etdiyi uğurlardan danışan natiq Vətən müharibəsində mənfur düşmən üzərində qazanılan qələbədən də söz açıb, bu mühüm hadisənin müstəqillik tariximizin şanlı səhifəsi olduğunu, qəhraman əsgər və zabitlərimizin 20 Yanvar şəhidlərinin mübarizlik ənənəsini şərəflə davam etdirdiyini bir daha vurğulayıb.
Tədbirdə muzey əməkdaşları Cəmilə Rzayeva, Lalə Əliyeva, Fəridə Azadova, Nailə Məmmədli də çıxış edib, sovet qoşunlarının xalqımıza qarşı həyata keçirdiyi terroru qınayaraq, 20 Yanvar gününün Azərbaycanın azadlığı və bütövlüyü uğrunda mübarizəsinin ilk və önəmli hadisəsi olduğunu qeyd ediblər. Çıxışçılar məhz bu hadisənin Azərbaycan xalqının müstəmləkə rejimi ilə heç zaman barışmayaraq, milli kimliyini, azadlığını, suverenliyini hər şeydən üstün tutduğunu nümayiş etdirdiyini qeyd ediblər. Bildiriblər ki, Azərbaycan ordusunun başda müzəffər Ali Baş Komandan İlham Əliyev olmaqla əldə etdiyi möhtəşəm zəfər də bunu bir daha sübut edir.
Sonda “20 Yanvar xalqımızın qürur tarixinin ilk səhifəsidir” adlı sərgi muzeyin rəsmi Facebook şəbəkəsi vasitəsi ilə canlı yayımlanaraq tədbir iştirakçılarına təqdim olunub.









© Bütün hüquqlar qorunur. Xəbərlərdən istifadə edərkən www.huseyncavid.az saytına istinad zəruridir.